Kabineti i kryeministrit italian, Giuseppe Conte ka miratuar një dekret që kërkon marrjen e masave financiare me vlerë 55 miliardë euro, për të mbështetur ekonominë e goditur rëndë nga pandemia e COVID-19.

Dekreti, fillimisht ishte prezantuar në fund të muajit prill, u vonua për shkak të tensioneve brenda partnerëve të koalicionit për një masë specifike për të rregulluar problemin e punëtorëve emigrantë pa dokumente, përcjell Telegrafi.

Kjo pako do të sigurojë 25.6 miliardë euro për të rinovuar pagesat e kompensimit për të punësuarit e mbetur pa punë dhe një shpërblim financiar në vlerë 600 deri në 1,000 euro për të vetëpunësuarit në muajt e ardhshëm.

Rreth 5 miliardë euro fonde të pakthyeshme do të jepen për ndërmarrjet e vogla dhe të mesme që luftojnë me ndikimin e COVID-19.

Deri në 60 për qind të qirave të paguara në tre muajt e fundit nga bizneset që u detyruan të mos funksionojnë gjatë mbylljes, do të rimbursohen nga shteti.

Aktualisht numri i të infektuarve me COVID-19 në Itali është 222,104 persona, kurse numri i vdekjeve është mbi 31 mijë.